بسم الله الرحمن الرحيم
هنستكمل الصيانة الدورية اللازمة للعربية والناهردة هشرحلكو طريقة تغيير طرمبة المياه ازاى .
أولا عشان تعرف ان طرمبة المياه عندك خلاص باظت وعايزة تتغير هتلاقى المياه مش بتقلب فى الريداتير او هتسمع منها صوت ترزيع وده بيبقى كده خلاص الطرمبة جابت اخرها ولازم تتغير وعشان تتأكد ان صوت الترزيع طالع منها ولا من الدينامو لانهم جمب بعض .. هتجيب ماسورة مياه قديمة تحطها عالطرمبة ( زى سماعة الدكتور :) ) هتكشف عليها يعنى ... ونفس الكلام عالدينامو .. هتعرف الصوت جاى منين .. لو كان الصوت جاى من الدينامو ده حدوته تانيه طبعاً بلى الدينامو هيتغير وده حوار تانى هنتكلم فيه بعدين .
سعر طرمبة المياه :
- صينى 70 جنيه
- تركى 95 جنيه
- يوغزلافى 105 جنيه
- اسبانى 110 جنيه
- ايطالى 115 جنيه
انا بصراحه جبت اغلى حاجه اللى هيه الايطالى .. ودى صورتها
اول حاجه هنعملها طبعا هنفك المسمار ال 19 بتاع رجلاش الدينامو عشان نقدر نهوى السير بتاعه ونفكه .. وابقى افصل السلكة الكهرباء بتاعت الدينامو احتياطى عشان مفيش حاجه تلمس معاك لاقدر الله .
بعد كده هتجيب مفك تحطه تحت السير وتدخله من تحت الطمبورة بتاعت طرمبة المياه وترفعه سنة بسيطه .. وبعدين تدى للعربية الغيار الرابع وتزقها سنة بسيطه لقدام بحيث ان السير يطلع من الطمبورة
دلوقتى بعد مافكينا السير خلاص هنبدأ نفك مسامير الطرمبة هما 4 مسامير 13.. هنفك واحد واحد بالراحه جداً ومنقرصش عليهم واحنا بنفك ولو المسامير تقيلة فى الفك متقرصش عالمفتاح واخبط عليه بايدك واحده واحده لحد مايتفك معاك .
طبعاً كل اللى هتعرف تفكهم هما المسمارين اللى قدامك دول او ممكن ال 3
مسامير اللى ظاهرين فى الصورة وهيفضلنا مسمار واحد بس مش ظاهر ومكانه رخم
شوية وده وعشان نفكه هنضطر نفك مسمار قاعدة الموتور ال 17 ونرفع الموتور من تحت بالكوريك .. هتجيب اورمة خشب وتحطها على الكوريك وتحمل على كرتيرة الزيت ولازم اورمة خشب افضل عشان الكرتيرة متتطبقش .. ولازم الموتور يترفع عشان تلاقى زاوية كويسه تقدر تفك بيها المسمار ال 13 الاخير بتاع الطرمبة وهتحتاج مفتاح 13 مشرشر عشان تقدر تفك بيه عشان المكان رخم شوية
بعد ماتفك الاربع مسامير بتوع الطرمبة خلاص هيه كده جاهزة معاك عالخلع على طول وطبعاً هتلاقيها جامده وماسكه ومش عايزة تطلع فى ايدك بسبب السيليكون اللى كانت ملزوقة بيه وهتحتاج شاكوش تقيل ( ادوم ) اخبطها خبطة بسيطه هتلاقيها طلعت على طول خلاص انا كده فكيت الطرمبة من مكانها وطلعتها خلاص وده شكل مكانها بعد ماتفكت
وده شكل الطرمبة بعد ماطلعتها .. طبعا الصدأ واكلها وطالع عين اهلها
ودى الطرمبة الجديدة اللى جبتها جاهزة عالتركيب .. طبعاً فرق شاسع بين الاتنين :D
طبعاً قبل ماتركب هتنظف مكان الطرمبة القديمة ( الشفه الخارجيه ) هتكحتها بسكينه معجون او مفك عادة .. اهم حاجه تشيل الجوان القديم اللى لازق فى الشفه وتصنفرها بصنفره ناعمه على خفيف اوى عشان متبوظش الشفه وتحتاج تغيرها هيه كمان وده موال تانى احنا فى غنى عنه .. اهم حاجه تتأكد ان مفيش اى أثر للجوان القديم خالص .
دلوقتى هتجيب الجوان الجديد اللى جاى مع الطرمبة وتظبط مكانه عالطرمبة نفسها وبعدين هتجيب سيليكون حرارى تدهن بيه الشفه بتاعت الطرمبة قبل ماتحط الجوان عليها .. خلاص حطيت السيليكون وحطيت الجوان .. حط سيليكون تانى فوق الجوان بقى قبل ماتركب الطرمبة وتكبسها فى مكانها .
ده شكل الجوان بتاع طرمبة المياه
وده السيليكون الحرارى اللى انا جبته ماركة اسمها هارديكس صناعة امريكى سعر الانبوبه ب 8 جنيه .. وفى نوع تانى ناس كتير بتشكر فيه اسمه 999 صناعة امريكى برضه وسعر الانبوبه بتاعته ب 15 جنيه موجود عند بتوع قطع الغيار وفى التوفيقية عند واحد مش فاكر اسمه تقريباً منعم صليب .. وانا بصراحه ملقتهوش عندى ومفيش وقت انزل لسه التوفيقية فا جبت النوع ده من عندى امشى بيه حالى وخلاص .
هنا خلاص انا حطيت السيليكون وكبست الطرمبة الجديدة فى مكانها وربطت المسامير تانى تمام الحمد لله .. تقرط عليها خلف خلاف .. يعنى تعشق المسامير كلها فى مكانها من غير تقريط وبعدين لما تيجى تقرط على المسمار اللى عالحرف يبقى تقرط عالمسمار اللى قدامه على شكل حرف X
هنا خلاص الحمد لله خلصت كل حاجه ورجعت كل حاجه زى ماكانت ترجع سير الدينامو مكانه وتشد الدينامو تانى وتربط الصامولة بتاعته وترجع تنزل الكوريك وتريح المكنة مكانها وتربط المسمار بتاع قاعدة الموتور تانى ومتنساش تركب سلكة الكهرباء بتاعت الدينامو بعد ماتوصل كل حاجه .. وبكده نكون خلصنا
----------------------------------------------------
يارب يكون الموضوع عجبكم ...
مع تحياتى
