الخميس، 12 فبراير 2015

رش عربيتك دوكو بنفسك - موضوع كامل وشامل الأسعار والخامات

 بسم الله الرحمن الرحيم




الموضوع ده انا ناقله من كذا ماكن : جروب الحرفيين الهواة - موقع نايل موتورز شرح الأستاذ احمد فارما وطبعاً عدلت فيهم شوية حاجات تنسيق للموضوع والذى منه وقولت أجمعه هنا عشان يبقى مرجع لكل الناس والكل يقدر يستفاد منه على طول .. وطبعاً البركة فى الرجالة اللى قامت بالواجب وعملوا الموضوع ده بنفسهم .. ندخل فى الموضوع .
-------------------------------------------------
عملية دهان السيارات في مصر .. عملية مفتوحة للنصب بشكل كبير سواء إستخدام الخامات الرديئة .. أو إستخصار المجهود والكروتة أو المبالغة في السعر ومن هنا ومن هذا المنزلق قررت إني أرش عربيتي بإيدى أنا فتحت موضوع دوكوو .. لكن إتأخر كتير لأكتر من سبب لاداعي لشرحها .. فتحت جوجل صور وسجلت على منتدى أجنبى للسيارات الكلاسيكية .. قابلت واحد إسمه Matt على منتدى أمريكى الراجل ده صاحب مركز تجديد السيارات الكلاسيكية وكتر خيره فضل ماشى معايا خطوة بخطوة .. لأن للأسف في البحث على جوجل .. ملقتش ولا موضوع بالعربي عن رش العربيات .. إلا طبعا الدعاية عن الورش أو خلافه .. لكن حد حط خبرته في طريقة رش العربيات .. بصراحة ملقتش فأنا قررت أن أكون أول مصرى عربى يعمل عربيته بإيده بدون خبرة سابقة وأول مصرى يعمل عربيته ويوضح للناس الخطوات خطوة بخطوة بالصور قدر الإمكان ونايل موتورز أجدر أنه يشيل الموضوع ده .
  
-------------------------------------------------
الخامات المطلوبة علشان تعمل عربيتك في جراجك أو تحت بيتك :

1- كومبروسور هواء ( انا طبعا ماجبتش .. فكنت بستخدم الكومبرسور بتاع واحد بتاع محل كاوتش وزيت قريب مني )
2- مسدس هوا .. سعره بــ 120 - 140 جنيه
3- معجون صاج .. عبوة 3 كيلو في حدود 50 جنيه .
4- معجون فايبر .. إستخدامه قليل ورخيص بـ 25 : 40 جنيه
5- ورق سنفرة متنوع .. 80-120-320-600-1200 ... إلخ .. الفرخ الورق بــ 4 جنيه
6- جركن ثنر وده رخيص بــ 16 جنيه الجركن 3 لتر تقريبا
7- سكينة معجون وجلدة فرد .. بــ 5 جنيه تقريبا
8- 3 بكرات لزق ورق .. البكرة بـــ 3.5 جنيه
9- كام كيلو ورق جرايد بـ 5 : 10 جنيه
10- علبة فيللر بطئ بـ 40 جنيه
11- بطانة للصاج إسمها كابسي سيرفسر تقريباً بـ 30 جنيه
------------------------------------------------- 

المرحلة الأولى : صنفرة العربية بالكامل عالصاج
الخطوة الأولى زي ما عم Matt قالى لازم العربية تكون على الصاج فكان لازم ألتزم حرفيا وشلت البوهية كلها على الصاج .. شيل البوهية له اكتر من خيار .. ياإما تشيلها بالسنفرة . سنفرة 40 او 80 أو بطرق كيميائية أو بصاروخ وديسك سنفرة .. الأسهل الكيماوى .. لكن ماحاولتش بصراحة فشلتها بالصاروخ وديسك السنفرة .

شكل الديسك كالأتى


الصاروخ بيتمسك بزاوية 30 درجة على الصاج بدون ضغط على الصاج يدوبك تمشيه كده رايح جاى .. العملية في الاجمال خدت منى 3 ساعات فى الاربع ابواب .. والرفرفين اللى ورا العربية بقت كده على الصاج .

العربية فى النهاية بقت زى كدة بالمنظر ده

ده شكل الصاروخ بالديسك
 طبعاً الصاروخ البوش ده أنضف وأغلى حاجه سعره تقريبأ 1500 جنيه .. وفى أنواع تانيه كويسة برضه وشغاله بس صينى وسعرها 130 : 150 جنيه منها ماركة كراون
كدة خلصنا المرحلة الأولى والعربية بقت عالصاج
 -------------------------------------------------
المرحلة الثانية : دهان البطانة على الصاج

هتروح عند بتاع الدهانات .. وتقوله عاوز كابسي سيرفسر surfacer ودي بطانة للصاج مباشرة ولو لقيت عنده كابسى كوت 805 .. هاته البطانة دي للصاج بشكل مباشر علشان عزلها .. وعزل الصاج .. الكيلو بــ 17 ج تقريبا حسب مانا فاكر .
 
1- تغسل العربية غسلة محترمة .. بالمياه والصابون
2- تنشفها كويس أوي بفوطة ماتسبش وبر على العربية
3- تلزق الازاز والاجزاء الي مش هتترش بالجرايد
4- تمسح أي تراب بفوطة قطن ( انا مسحتها بفانلة داخلية قديمة )
5- تخفف البطانة بالفيلر بالنسبة الي مكتوبة على علبته .. غالبا 1 : 2 التلت ثنر .. والتلتين بطانة .. وترجها كويس قبل ما تحطها في علبة مسدس الهوا .. وياريت تقف في حتة بعيد عن التراب والهواء والعفرة والطريق .
6- ترش يمين وشمال .. ببطئ مش اوي يعني تظبط المسدس إن الرش يكون خفيف علشان ميسيلش .

الصورة من موقع أجنبى .. وأتمنى الاقى صور العباقرة المصريين بتوعنا وهما شغالين هتكون افضل


كده خلصنا المرحلة الثانية والعربية دلوقتي بقت على البطانة

-------------------------------------------------
المرحلة الثالثة : ظبط السوكة body lines

بصوا يارجالة .. كنا وصلنا إن العربية دلوقتي على البطانة .. البطانة اللى على الصاج اللى إسمها سيرفيسر surfacer .
الخطوة دى بتغسل فيها العربية كويس جداً .. وتبل السنفرة (سنفرة 120) ويدوبك تحط السنفرة على الصاج وتزقها ماتحكش جامد يعنى يادوب تمشي إيدك بالسنفرة على الصاج لحد ما تخلص العربية كلها وتسيبها تنشف حوالى ساعتين تلاتة براحتها خالص علشان المرحلة الجاية مرحلة المعجون .. والمعجون بيشرب الميه واقل رطوبة هيشربها ولو شرب ميه أو شم رطوبة بعد ما ترش هينفخ والبوهية هتشقق وتطقطق وتبقا ليلتك سودا يامعلم .
 

انت بتسنفر لحد استواء السطح والأهم طريقه السنفره .. بتلف فرخ السنفره على حاجة اسمها sand-block ودى عبارة عن خشبة مستقيمة (أو أى جسم صلب مستوى ) بيتحط عليه السنفرة علشان لما تسنفر بيه .. يكون السطح مستوى تماما



اتجاه السنفرة في السطح المستوي .. بيكون حرف X تسنفر من فوق لتحت مايل يمين .. ومايل شمال بالتساوي الساند بلوك ممكن يكون بلاطة طويلة وتلف عليها السنفره ... دي تضمنلك تقريبا سطح مستوي ودي احسن من طريقة الصنايعيه في انه يسنفر بإيده لأن ده العك بعينه وبتعمل grooves ومابتديش سطح ولو حتى شبه مستوي .. بتلاقي الجمب مموج .. السنفرة تحت الساند بلوك .. يتكون مستقيمة تماما لما تمشيها على حته فيها عالي وواطي.. هتعمل كونتاكت مع العالي الأول .. وهتفضل تاكل فيه لحد ماتوصل للواطي وتكون معاك النتيجة أن العالي بقا في نفس مستوى الواطي والسطح مستقيم تماما
 

بعد ما العربية نشفت .. تمسحها كويس جداً .. وتبدأ تشد لزقة ورق على الحتت الي أنت هتظبط فيها السوكة .. فيه حاجة إسمها ( الإدة ) بتشديد الدال .. دي بتتحط فوق السوكة .. وتتلزق عليها .. وتشد عليها المعجون وتسيبه ينشف وتشيل ( الإدة ) دى وتكمل المعجون تانى .. الإدة دي زي المسطرة الحديد كده أنا طبعا ماعرفتش أجيبها منين .. فروحت إستلفت صفيحة منشار طويلة بتاع 2 متر من النجار إلي قدامى هتقضى نفس الغرض وكان فيه كسر في العتبة سنفرته بالصاروخ وحطيت عليه شعر فايبر .. وحطيت عليه بولى إستر مخلوط بالمصلب .
ودى كانت أخر حاجة قدرت أجمعها من شرح الدكتور احمد فارما وبعد كده الموضوع بقى عبارة عن رغى عالفاضى وصور منتهية الصلاحية ومش عارف اصلا شكل عربيته بقى عامل ازاى !!! والله اعلم 
 ------------------------------------------------- 
المرحلة الرابعة : مرحلة التجهيز لدخول الفرن
ودول شوية فيديوهات عالماشى لطريقة تجهيز ورش العربية دوكو




 -------------------------------------------------

وده موضوع تانى للأستاذ عمرو محسن عمل عربيته بنفسه ربنا يباركله

السلام عليكم يا اصدقائى الحرفيين .. اولا احب اشكركم جميعا لمساندتى وتشجيعى ثانيا التقرير المفصل :
مبدئيا انا عربيتى قديمه وزى ماهتشوفوا الصور انا اشتغلت على ال 4 رفارف وجزء من السقف وجزء من الشنطه والكبوت .

1- خامات التاسيس :
- علبة معجون ستوك 3 كيلو بـ 40 جنيه
- فيلر سريع كابسى بالمصلب بالتنر علبه 1.7 كيلو بـ 42 جنيه
- 1/8 كيلو دوكو احمر ب 15 جنيه لخلطه مع الفيلر لتقريب لون البطانه الى اللون النهائى


2- العدد والادوات المستخدمه :
- 2 فرخ صنفره 60 بـ 8 جنيه
- فرخ صنفره 180 بـ 4 جنيه
- فرخ صنفره 320 بـ 4 جنيه
- سكينه معجون و 2 فبره بـ 15 جنيه
- مساكة صنفره ب 15 جنيه
- قرص صنفره للصاروخ ب 8 جنيه
- صاروخ
- كمبريسور

3- الفينش :
-  كيلو دوكو فرن كابسى بالثنر والمصلب والجرايد وبكر اللزق بـ 133 جنيه
مصنعية كابينة الفرن 70 جنيه
الشاى وكده للصنايعى 20 جنيه


كده الاسعار بالتفصيل الممل

ندخل على التشغيل والوقت :
العربيه اخدت 3 ايام عمل بواقع 3 ساعات فى اليوم وده طبعا لضيق وقتى وانى لازم افحص وارخص باسرع وقت .
- اليوم الاول تجهيز العربيه (غسيل العربيه غسله محترمه ) علشان ابين البويه المطقطقه واشتغلت الاول بالصاروخ وعليه قرص الصنفره لحد ما نزلت كل البويه المطقطقه ولمعت مكانها والصاج المكشوف وبعد كده بالمياه والرابسو والصنفره ال 60 عديت على العربيه بالكامل ادتلها شطفه محترمه تانى ونشفتها جامد وبعدين تم عمل المعجون طبعا هدرت كتير لحد ما قدرت اضبط كميه المعجون مع المصلب ومسك السكينه والفبره على كل الاجزاء مع مراعاة العالى والواطى .

- اليوم الثانى عمل تصفيه للمعجون بالصنفره 60 مع المياه بالرابسو ( جردل فيه مياه بالرابسو وفوطه صفراء ) لازم المياه مع الصنفره والصنفره تكون فى المياه قبل الاستخدام بربع ساعه وبعدها تنشيف العربيه وتلقيط المناطق الواطيه بالمعجون وبتكون اسهل واوضح .

- اليوم الثالث والاخير تم تنعيم الاجزاء الملقطه بالصنفره الـ 180 ورش الفيلر ( البطانه ) بالكمبريسور مع خلطه ب 1/8 كيلو احمر علشان اللون يستر باقل كمية دوكو وده كان بالنهار واخد حوالى ساعه ونصف لحد ما نشف وبعدها صيفت الفيلر بالصنفره ال 320 والمياه والرابسو لحد ما وصلت لدرجة النعومه المطلوبه ووديتها الكابينه واديت للصنايعى الدوكو والجرايد واللزق وهو قام بالتلزيق والدهان النهائى .


ودى محصلة الشغل بتاعى والحمد لله

 

 
 



وده الشكل النهائى


 واخيرا بشكركم كلكم لمساندتى وتشجيعى ومشاركتى فرحتى بإتمام تجربتى .
 
 -------------------------------------------------

وده موضوع تانى للأستاذ Zingo Beso Zingo

 =========================
إزاى تدهن عربيتك بـ 100 جنيه بنفسك
=========================
بسم الله الرحمن الرحيم

الموضوع و ما فيه كنت بسأل من يجى سنة فيها إيه لو دهان العربية حاجه غير الدوكو ؟ الكتروستاتيك - انامل - أو لاكيه حتى ؟ إيه اللى هيجرى .. مهندس الفحص كده كده أيدة طويلة و لو عربية زيرو و عصلجت معاه هيفرتك الفرش بتاعها علشان صاحبها يدفع أضعاف الرشوة لسروجى .. و كمان فيه مواقف ممكن تحصل وأنت مزنوق مادياً و محتاج تتصرف .. النمرة أتسرقت أو وقعت و طبعاً لازم تعمل مذكرة فقد فى القسم و مينفعش تمشى أكتر من 3 أيام و إلا لو لجنه رخمة قابلتك !!! ربنا يستر .. و طبعاً لازم فحص و تسلم النمرة القديمة و تأخد نمرة غيرها .. والعربية شكلها جربان من الركنه فى الشارع والشمس و المطر و .... إلخ و الميزانية بايظة ووراك فحص .. توكل على الله و تابع معايا .
-------------------------------------------------

1- تودى العربية لسمكرى إبن حلال يلملك اللى فيها .. و من خلال خبرتى المتواضعة مع " دقاق الصاج " أحب أقول إن 99.999% منهم شغلهم لازم يطلع فيه عيوب والحاجه اللى تدق وتآخد حموات مستحيييييييل ترجع بأبعاد الفابريكا .. فالمهم تهتم بإن ميكونش فيه بارومه أو شروخ أو أو ... الأساسيات يعنى .

2- تستلم العربية و تجهز الآتى :
 
× مكان للشغل (جراج أو شارع هادى قريب أو قدام البيت لو فيه مكان 
× صاروخ قطعية (فيه أنواع صينى فى العتبة و الرويعى و الجمهورية من أول 75 جنيه .. و أنضف الأنواع INGCO - APT Crown لو صاروخ 5 بوصة ممكن يوصل لـ 175 - 200 جنيه ) - لو معندكش صاروخ مفيش مشكلة بس هتتعب شوية فى السنفرة يدوى .
 
× أفرخ سنفرة 80 ، 140 (ممكن السنفرة الـ 80 تجيبها بكرة بالمتر, هات 4 متر, بتستحمل شوية عن الأفرخ الورق بس هاتها مقاس 100 مش 80)
 
× مسدس بينت زوم اللى فى التليفزيون .. بيتباع على موقع سوق بـ 200 ج بالشحن .. أو تأجر مسدس و كمبروسر من أى محل جنبك ( مسدس الدوكو فى كلوت بك من أول 60 ج و إنت طالع )

× علبة معجون حديد ( استوك ) علبة 2.750 جم - بيقولو عليها 3 ك + انبوبة المصلب بتاعها بـ 43 ج (ماركة معفنه اسمها ميدو و كل الصنايعية شغالين بيها متفكرش هيجيبلك سكينز حاشا و ماشا .. و أتأكد أوى من السعر علشان سألت على الواحد كيلو نفس النوع لاقيتها بـ 45 جنيه فى محل تانى !!!
× علبة لاكية ( لاكيه بأقول مش دوكو .. و يكون لامع بتاع سايبس .. و تجيب أرباع وانصاص لاكية و تخلطهم لنفس درجة اللون أو تخلى الموان يخلطهملك لو عاوز درجة صعبه شوية )
 
× بلاستيكة فرد و سكينة معجون
 
× خرطوم علشان هنشفط شوية بنزين من التانك أو شوية ثنر لو هتستخدم مسدس رش ( مش بينت زووم Paint Zoom علشان الثنر هيأكله )

× بكرة لزق ورق و شوية جرايد محترمين
 
3- تلبس عفريتة الشغل وتفضى العربية من بره بالكامل من أى حاجة زى المساحات والمرايات الجانبية والفوانيس والغمازات والإشارات والباكتات والدلايات والإكصدامات .. يعنى خليها عالصاج بس .

4- تبدأ بسنفرة 80 أو 100 لكامل جسم العربية سواء علية دوكو قديم أو أتعمل فيه سمكرة و بقى عالصاج .. لو فيه أى معجون قديم مشقق أو مطقطق لازم ييجى عالصاج فى الجزء المطقطق ده ( الصاروخ وقرص سنفرة 40 هيساعدك جداً ) .. كله يتسنفر حلو وبعدين يتغسل بالمياه و تنشفه .

5- تفتح علبة المعجون وتقلبها بسكينة المعجون علشان الزيت اللى عالوش يتخلط بيها .. و تسحب شوية عالسكينة ( نص سكينة المعجون و تحط عليه من 2-3 سم مصلب وتقلب ببلاستيكة الفرد المصلب مع المعجون اللى عالسكينة و تبدأ تسحب معجون بالبلاستيكة ( مش بالسكينة ) .
ملحوظة مهمة : أوعى و إياك تحط المصلب على العلبة كلها تخلط حبه حبه على القد و تكون أيدك سريعه فى فرد المعجون عالصاج .. لو بطئ .. قلل الكمية علشان المعجون بعد مبيتخلط بالمصلب قدامك عالأكثر 4 دقايق و تلاقيه نشف و هو لسه عالسكينة و تضطر ترميه وبالنسبة لسحب المعجون بيكون على المناطق اللى فيها شغل سمكرة أو كان فيها طقطقة معجون قديم ( و شلته طبعاً بالصنفرة ) .. لو عندك أى جزء مدهون قبل كده و مفيش فيه شغل يبقى تخليه متصنفر بس و متجيش جنبه بأى معجون .
6- سنفر ثم سنفر و بعدين بقى ... سنفر .. المرحلة دى كل متخدم فيها حلو الناتج النهائى هيطلع بإذن الله ممتاز .. و أفضل طرق الصنفرة على حاجه إسمها Sand block دى حته خشب بتلف عليها السنفرة و تسنفر بيها مش بإيدك .. علشان بتساوى العالى مع الواطى بالضبط و لو حته لسه محتاجه معجون نضفها من غير مياه ( علشان المعجون لو تحته مياه هيقع بسرعه ) و تزود معجون .. و تسنفر و تسنفر و تسنفر .
7- بعد المعجون كده وصلنا لمرحلة الرش و تلبيس العروسة شوية جرايد قديمة وبكرة لزق الورق .. وطبعاً عارف هتعمل إيه .. أى كاوتش - زجاج - نواكل - بلاستيكات - كوالين - مقابض .... إلخ أى حاجة معرفتش تفكها تداريها تمام باللزق و الجرايد .. و تخلى أيدك مسطرة عالحرف بالضبط و أنت بتغطى علشان الدهان ميبقاش طالع مثلاً على كاوتش البربريز من جنب و الجنب التانى نازل .. ولو مكنتش فكيت الكاوتش بالجنوط ممكت تلبسه أكياس قمامة .
ملحوظة هامة : الفواصل اللى بين الأبواب وفواصل الكبوت والشنطة والريداتير وأماكن الفوانيس كل الحاجات دى يتحط عليها جرايد علشان البوية متدخلش على أماكن انت مش عاوزها .
8- تخلط الألوان وتخفها بالبنزين أو النفط الأبيض .. أو الثنر لو مسدس رش معدن .. تجرب الأول على لوحة علشان تضبط اللون واللزوجة ( محتاج يتخفف او يتقل ) و تبدأ ترش السقف الأول .. وايدك تكون سريعة نسبياً بنظام التسطير ( يعنى رايح من اليمين للشمال فى سطر وراجع من الشمال لليمين على السطر اللى بعده ) .. وبعدين الشنطة و الكبوت .. وبعدين الجوانب وتسرع إيدك فيهم أكتر علشان البوية متسيلش ( لإن الجوانب واقفة مش نايمة زى السقف و الشنطة ) .. كيلو بوية + لتر بنزين يكفو العربية كلها تمام و يتبقى منها حسب سرعة أيدك .. وممكن بعد متنشف تأخد وش تانى ( كيلو اللاكية بـ 20 ج بس يا محترم .. مش الدوكو اللى أقل نوع بـ 120 و مضروب كمان و لسه فرن و شاى و سجاير و ليله ميعلم بيها غير ربنا .

9- طبعاً بعد متنشف تانى يوم ( الجفاف المبدئى 4 ساعات .. الجفاف التام 16 ساعة ) .. هتركب تانى كل الإكسسوارات و الكماليات اللى فكيناها .. و ميمنعش لو تجيبلك علبتين دوكو اسبراى .. واحده سودا وواحدة فضى ميتالك .. للأكصدام و المرايات و الجنوط ... هتلاقى شكل تانى .

النتيجة  : عن تجربة أكتر من شهر حتى الآن .. اللاكية بيستحمل الشمس و التراب و الزيت و الجاز و البنزين و الشحم ( عادى بأحط الحاجات دى علشان أطفال الشوارع متقعدش عالعربية ) و بيتغسل بالمياة و الصابون عادى .. و لونه مبيغيرش .. و بيلمع أقل شوية من الدوكو ( بس لمعه مقبولة جداً خاصة إنه مدخلش فرن و لا أخد وش ليكر و لا بولش و لا الكلام ده ), فيه كل درجات الألوان و تخلط كمبيوتر و يدوى زى ما أنت عاوز ( مش زى ألوان علب الإسبراى الجاهز ) .. والأهم طبعاً .. بثمن كيلو دوكو أوميجا أو كابسى أو ميدو اللى شغال بيه كل الصنايعية اللى سعرها من 120 - 150 للكيلو تقدر ترش عربيتك وش نضافة كل 6 شهور ب 20 ج للكيلو . 
  
------------------------------------------------- 
تكلفة الخامات اللازمة لرش السيارة دوكو فرن كالاتى :

أولاً اسعار البويات :
النوع الأول
اردئ نوع هو الاوميجا سابقا او كابسى حاليا بعد ما شركة بورسعيد اشترتة ودة الكيلو 120 جنية شامل المصلب والتنر 
النوع التانى 
الجينرال ودة لبنانى الكيلو 150 شامل المصلب والتنر 
 
النوع الثالث 
ماكسمير ودة ايطالى الكيلو 180 شامل المصلب والتنر 
النوع الرابع
اسكينز ودة فى منة المانى وتركى والاغلب هيكون مضروب بالتركى مش هتلاقى الالمانى والاسم التجارى بتاعة اسمها البغبغان لان اللوجو بتاعها بغبغان ودة الكيلو بتاعة من 400 لـ 500 شامل التنر والمصلب .
ملحوظة 
الورنيش لازم يبقى نفس نوع البوية وفى منة درجات حسب اللمعه الى انت عايزها وسعر الورنيش نفس سعر نوع البوية لو هترش بكيلو بيتحط نص كيلو ورنيش على الكيلو .

-------------------------------------------------
ثانياً أسعار الخامات

بالنسبة لأسعار الخامات انا معرفهاش بصراحه بس دى أسعار جبتها من خلال كومنتات الرجالة عالجروب اللى جربوا عملو دوكو لعربياتهم وجابو الخامات بنفسهم ، وعن قريب بفكر أعمل الحوار ده أنا كمان .. اشمعنى انا هيه جت عليا :)
سكينة معجون و2 فبره بـ 15 جنيه
صنفره ومعجون ستوك بـ 55 جنيه
مساكه للصنفره بـ 15 جنيه
فلر بلون البطانه بـ 40 جنيه
البويه كابسى بـ 110 جنيه والفرن الكيلو بـ 140 جنيه بالمثبت والتنر والورنيش
يعنى الإجمالى كله العده والمونه بـ 265 جنيه لسه بعد مخلص ان شاء الله هرشها فى كابينه بـ 70 جنيه كده وصلنا لـ 335 جنيه

علبة معجون 3 كيلو و المصلب بتاعة بـ 43 جنيه
سعر المعجون علبه كيلو و ربع + انبوبه المصلب ب 23 جنيه
فيللر سريع 1 كيلو بـ 30جنيه
قرص صنفرة للصاروخ 40/80 بـ 2.5 جنيه
ورق صنفرة مقاسات بـ 5 جنيه الفرخ
جركن ثنر 1 لتر بـ 5 جنيه
جركن ثنر 2 لتر بـ 10 جنيه
فلر بطئ بعد سحق المعجون و التلقيط و ده بـ 40 جنيه
و بعدين الدوكو كابسى أو أوميجا حسب طلبك (عادى - ميتالك - تخليط ألوان بالكمبيوتر- و ساعات بيغشو فيها بيحطو خامات رخيصة فى الخلط لذلك محتاجه أمانه) الأسعار من 130 جنيه و إنت طالع للكيلو و قالى رش أى عربية عند بتاع الكابينه 70 جنيه + الشاى بتاعة
----------------------------------------------------

يارب يكون الموضوع عجبكم ...

مع تحياتى

الأرشيف

جميع الحقوق محفوظة لــ Monster Fiat 128 2016 ©