حكايتى مع التاكيهات .. موضوع شامل ومفصل عن طريقة ظبط التاكيهات

بسم الله الرحمن الرحيم

طبعا حضرتك عارف البساتم بتشتغل إزاى وتوصيلها مع الكرنك من تحت .. فوق بقى فى وش السلندر ايه اللى بيميز عربية عن التانية ماهو كل العربيات ميكانيكيا واحدة .. واللى بيفرق عربية من التانية هو وش السلندر .

الفيات عاملة وش سلندر خفيف وظريف وسهل الظبط لكن القوة اللى بيأثر بيها على أداء الموتور ضعيفة بالمقارنة مع المواتير الالمانى واليابانى لأن كل واحد عنده التكنولوجيا بتاعته اللى عمل بيها وش الموتور .

العربيات الألمانى بقى عاملين تكنولوجيا أحسن شوية والإيطاليين سرقوها منهم اما اليابانيين بقى محدش قدهم عملوا وش سلندر تحفة بيطلع من مكنة 1600 سى سى قدرة 170 حصان

اللى جاى بقى أشكال الوش من جوه وهشرح التاكيهات بإذن الله

هنبدأ الأميريكان ماسلز ( الموستانج ) ، الصورة اللى جاية دى للوش بتاع السلندر هتلاحظ الشواكيش طالعة نازلة فوق الصبابات والسوست الجامده دى اللى بتساعد انها تحكم الصبابات فى غرف الحريق ، الشواكيش دى بقى لازم تظبط المسافة بينها وبين الصباب اللى بتدق عليه علشان ماتبقاش محملة ( علشان كده يقولك التاكيهات محملة ) أو يكون الخلوص بزيادة فيقولك التاكيهات مفتوحة وفى كلتا الحالتين العربية مش بتبقى مظبوطة - تسخن - تاكل بنزين - تنفخ زيت تضرب كاوتش الصبابات - وحاجات تانية كتير ممكن تعمل بلاوى مع ان ظبطها قمة فى السهولة والعبط .. تمام كده وخلى بالك ان معظم مواتير الفيات بالشكل ده والشواكيش بتتظبط مسمار وصامولة

نوع تانى بقى وده فى معظم العربيات الألمانى زى ماقلتلك ، اللى الطلاينة سرقوها ودى هتلاقيها فى الفولكس والفيات الألمانى والمواتير بتاعت السفينة الـ 132 وهى دى بقى اللى لازم تروح للخراط علشان يظبطها

ده شكل وش ال 132 من فوق بعد فك غطا التاكيهات

وده موتور كامه واحدة علوية برضو نفس النظام ركز بقى ، لاحظ ان عمود الكامة ماشى من فوق ( اللى باللون الغامق ومتثبت فى الوش .. شايف الأجزاء المثلثة اللى بتلمع وعاملة زى الجبنة النستو هى دى حدبات الكامة وظيفتها : العمود ده معمول بالكمبيوتر ومتقسم انه طول ماهو بيلف يفتح الصبابات ويقفلها حسب تقسيمة الصانع وده طبعا بيبدأ مع طلوع ونزول البستم والإشعال وهكذا طيب ايه اللى تحت حدبات الكامة بقى ؟؟ الأطباق والكستبانات ده بيبقى فى النوع ده من وش السلندر العمود بينزل يفتح الصباب ويقفله عن طريق الطبق والكستبان .. الكستبان فوق سوستة الصباب خبط لزق ، الأطباق بقى هى اللى بتتغير صيف وشتاء بمقاسات معروفه

بيتهيألى ان الصورة كده بدأت توضحلك صح ؟؟

علشان كده قابل بقى الصورة دى قطاع عرضى للوش ده بالظبط زى ماقلتلك مثلث الجبنة النستو بالسن بتاعه طالع نازل يفتح الصباب ويقفل بالسوستة لازم بقى المسافة مابين العمود ( قصدى مثلث الجبنة ) تكون مريحة لما يكون السن بتاعه لفوق ولو مش كده بتروح للخراط بيشيل الأطباق بطريقة هو عارفها ويغيرها ويظبط الخلوص ( المشكلة بقى يا كبير انك لازم تروح بدرى عند الخراط وتفتح كبوت العربية فى حته ظله وتبرد العربية تلج علشان يظبط الخلوص صح وماتبقاش محمله ولا مهوية لأنى زى ما قلت لو محملة هتاكل مثلث الجبنة النستو - تاكل بنزين - تهرب زيت لغرف الحريق لو ضغط الزيت جامد - وبلاوى تانية كتير ) ربنا يكفينا شر التاكيهات .

---------------------------------------

أشكال تانية برضو كنت عاوز أقولك عليها النوع ده فى الهوندا الأكورد بحبه جدا لأنه يجمع مابين قوة العزم وسهولة الظبط ولو مش واضح إسألنى هتلاقى الشكل ده برضو فى بعض العربيات الصينى بس الفرق بقى شكل المثلث فى عمود الكامة مختلف .. لأ كمان ده بيضاوى وشايف المسمار اللى بصامولة الصغير ده اللى بتظبط التاكيهات منه .. شايف الجمال والسهولة وفى نفس الوقت برضة قوة العزم

انا ما بحبش الحال المايل ، بس الكامة المايلة برضو ليها عيوبها وميزاتها

( مواتير شعبى بـ 1800 جنية الموتور بالفتيس ) والشكل ده فى معظم مواتير ال 131 الشعبى ومواتير البولونيز ( مع ان اخر موديل للبولونيز كان نازل 2003 ) بس فكرته حلوة برضه عمود الكامة تحت ومايل كده ومتوصل بالكرنك وسير الكاتينة فى منه نوعين ( سير كاوتش مسنن ) أو ( جنزيز ) علشان كده يقولك المواتير الكاتينة الجنزير خشنة وعمرها قصير من يومها

هنا بقى الشواكيش طالعة نازلة بحركة العمدان الإستيك الرفيعة Pushrods اللى تحت دى بتاخد الحركة من تحت عند عمود الكامة ( الكامة السفلية اللى قلتلك عليها ودى سهلة اوى فى ظبطها مفك وبنسة وفيلر

اهو كمان شكل تانى ونفس الفكرة

التاكيهات بتاعت الـ 128 نفس فكرة المواتير الالمانى لازم الخراط اللى يعملها انت هتروح بإذن الله لأى خراط بتاع كرنك ومواتير .. تنزل من البيت قبل ما الورشة تفتح ب 4-5 ساعات تفتح كبوت العربية وتسيب الوش يهدى على ماتشرب كام سيجارة مع كوباية شاى من الترمس أو حاجة ساقعة مع الجرنال :)

وأهم حاجة تفصل كابل الأرضى من البطارية ( ضرورى)

اول ما الوش يبرد هتبتدى تفور العمة بتاعت الكربراتير والخراطيم وأى حاجة تعترض غطا التاكيهات لحد ما يبقى زى كده

هتفك غطا التاكيهات بس وتعمل حسابك على جوانين إحتياطى من عند بتاع الكماليات ( سعر الجوان 5 جنيه نوع فل )

غطا التاكيهات بعد ماتفك ال 6 مسامير والجوان بتاعه نفس شكل الغطاء من تحت

هتلاقى من فوق عمود الكامة وتحته الأطباق والكستبانات غطسانين فى الزيت هتجيب سرنجة كبيرة وتشفط الزيت اللى حوالين الأطباق تحت حدبات الكامة ( مثلثات النستو ) وتستنى الخراط علشان ييجى يشتغل على طول بإذن الله
هييجى صاحبنا معاه الأطباق فى العلبة ومعاه العدة يظبط الخلوص ويقيس بالفيلر ويغير الاطباق المحملة ويظبط تمام

بعد كده تقفل موتورك وتدوره وتتأكد ان كل حاجة تمام ومفيش اى تسريب وماتنساش تجمع ( تربط ) المسامير بتاعت غطا التاكيهات خلف خلاف ولو الجوان فلين ماتحرقش عليه رباط عشان مايفوتش ويعمل مشكلة لا قدر الله

hydraulic valve lifter

valve tappet

classic car overhead

ده بتاع البولونيز وال 131 المواتير الشعبى عمود الكامة أهو تحت بياخد الحركة من الكاتينة وهنا كاتينة جنزير على فوق بالرود ( الصباع الطويل ) على عامود التاكيهات ( شواكيش ) وطبعا طريقة ظبطة سهلة بمفك وبنسة وفيلر

Engine tappets, Hydraulic valve lifter

وادى كمان البلوف اللى قلنا عليها بتاعت اللادا واللانوس ( فكيتها مرة فى الورشة كان واحد جاى ومعاه جولييت وكانت جايبة جوان وش ، طبعا فورت كل البلوف ومن جوا البلف كان مليان طحينة فكيتهم والحمدلله بلف بلف ورجعوا تانى فلة )
الميزة بقى فى البلوف دى انها بتدى عزم أكبر على السرعات العالية وتخليلك الموتور على الطريق محدش يلحقك علشان كده لما كنت رايح الغردقة بالفيرنا كنت بخيط واحد بتاع لانوس لحد سرعة 160 ميحصلنيش ، بعد كده صباح الفل الاقيه واخد الطريق قطر معرفتش أحصله ) مرة تانية كنت على طريق السويس بالـ 131 وقابلتنى صديقتى اللدودة اللادا برضو طلع منى على الخامس

ده الكستبان من جوا

وبرضو دى كستبانات

هنا بتظبط التاكيهات عن طريق انك تلف الكستبان وتظبط بالفيللر .. ده بقى وش السيلندر بتاع السيفيك ال 1600 سى سى فاكرين الموتور التعبان ده اللى بيطلع 120 حصان وانت طالع طبعا ده قصة لوحديها بص كده طبعا ماشاء الله تحفة فنية انت عارف صبابات البنزين والعادم طبعا الوش ده متطور جدا وتكنولوجيا سابقة أوانها

الجزء العلوى بتاع صبابات العادم وطبعا تقدر تظبطها بكل سهولة مش لازم خراط ( مفك وبنسة وفيلر ) الناحية بقى اللى فوق صبابات العادم وجنبها اللى فيها المواسير دى :
بتركب البوجيهات جوا المواسير دى وتلاقى البوجيه فى وسط غرفة الحريق وش عشان كده الموتور ده حامى وعالى الأداء

حاجة تانية كمان بخصوص الـ VTEC

المكنة دى المفروض انها 16 صباب

ايوه فعلا 4 صباب لكل بستم لكن هيا بتشتغل فى العادى 12 صباب والزيادة دول بيفتحوا مع ال VTEC على 3.5 أو 4.5 أر بى ام عشان تشتغل معاك 16 صباب وتاخد منها أقوى عزم ، وتلاحظ الموضوع ده لما تكون بتشد بيها ( الزنة المشهورة بتاعت مواتير السيفيك ) وخصوصا مواتير الـ SI والـ TYPE-R بس الـ VTEC مابقاش ينزل الإتحاد الأوروبى عشان بيزود إستهلاك الوقود ومش متناسب مع مواصفاتهم علشان كده شركة هوندا عملت الـ I-VTEC وضحكت عليهم ونزلت أسواق أوروبا ، لكن مع الأسف مبقيناش نطلع من مواتير السيفيك الهورس باور بتاع زمان لكن برضو الهوندا هوندا

هنرجع تانى للموضوع ببعض الصور الجديدة والشرح بتاعها

زى ماتكلمنا قبل كده ، فيه بعض أنواع العربيات من الكورى واليابانى التاكيهات مش بتتظبط ولا أطباق ولا رجلاش ( مفك وبنسة وفيلر ) اللى هيا بتبقى بلوف هيدروليك ودى صورة قريبة ليها .. شايفين هنا مفيش رجلاش مجرد البلف منه للمساعد لسوستة الصباب ومن فوق الجزء المدور ده عمود الكامة وهو بيلف ، بيفتح ويقفل والميزة فى البلف انه عمره طويل بس ركز معايا لو صوته على لازم يتكشف عليه ( اللى هوا صوت التنقير فى الموتور من فوق لأنه لوباظ هتبقى مشكلة كبيرة لا قدر الله )

تمام كده البلف اللى على الشمال ده فى خروم بيدخل منها الزيت لأنه جواه بستم صغير ( أيوه بستم ) وسوسته قويه وخلى بالك البستم بيبوظ والسوستة بتضعف علشان كده لازم تتابع الموضوع ولما تسمع أى صوت مشتبه فيه لازم تفتح وتبص على الدنيا جوا فيها ايه بص معايا كده

وش موتور عمود الكامة فوق بالمثلثة بتاعته Cam Lobe والبلف اللى هو Lash Adjuster الركبة اللى بتقابل عمود الكامة Rocker

وده الكستبان العادى اللى بيتغيرله طبق واللى على اليمين هيدروليك وده شكل الظبط بالفيلر بس خلى بالك كل عربية بتختلف عن التانية فى المقاس ( بيبقى مكتوب فى الكاتالوج بتاعها ) اللى بتحطه بالفيلر سواء لصباب العادم أو صباب دخول البنزين

الشكل ده بيظبط على 0.1

وده فيديو شرح يوضح اكتر طريقة الظبط ازاى

نيجى بقى للعدد المستخدمة فى ظبط التاكيهات غير المفك والبنسة والفيلر

الزرجينتين دول بتفك بيهم سوست الصبابات ودى بتنفع للتاكيهات اللى على الشواكيش

ودى كمان زرجينة تانية لفك الصباب بس ممكن ماتنفعش عندك او إحتمال انها تنفع فى حدود 40% ودى مش هتحتاجلها الا لو هتعمل كاوتش صباب اوروديه او عمرة

هو ده بقى المهم عربيتك هتتفك بالزرجينتين دول واحدة بتريح بيها الطبق لتحت تيجى على سنها بالجنب وتحط طرف الزرجينة وبعدين هتلاقى الطبق طلع معاك بالظبط زى أوشاط الطاولة

المفك اللى على اليمين تظبط بيه التاكيهات الشواكيش والفيلر المايل ده اللى بنقيس بيه يباشا

لاحظ هنا المفك فى النص والأسود ده زى مفتاح مشرشر ( بنستغنى عنهم بمفك ومفتاح 13 وخلاص وبيأدى نفس الغرض ) والفيلر موجود فيه جميع المقاسات اللى ممكن تحتاجها كلها ( 1مم ، 0.9مم ، 0.8 ......... 0.1مم )

سؤال ؟؟ وجواب !!

س : ياريت بعد الشرح والتوضيح نعرف اسم كل قطعة وبتتباع فين فى السوق المصرى ؟

ج : مكان بيع العدد دى فى شارع الجمهورية وفى التوفيقية وعند مين بالتحديد تقريبا شارع زكى والسعر كالتالى : زرجينة الصبابات مش هتحتاجها فى عربيتك لكن سعرها 40 جنيه والفيلر ب 10 جنيه والنوع كبير المايل ده بـ 15جنيه

س : ايه العدد والادوات الى احتاجها لخلع طبق تاكيه او اشيك على ثغرة الطبق ؟

ج : حديدة حرف يوه U ، وأجنه مايلة عامله زى سكينة الموز .

س : بس ليه السر فى ان الخراط بشحمه ولحمه هوا اللى لازم يظبط التاكيهات ؟ علشان هيخرط ؟؟ طيب لو حبيت أستبدل الاطباق باطباق جديدة مش المفروض ان الاطباق دى بتتباع زى اى قطعة غيار ؟ مثلا الطبق اللى يكون فاتح او عالى استبدله بطبق جديد ؟ كمان انا عايزك تشرحلى ايه الى بيعمله الخراط بالضبط فى الطبق ؟ مش بيخرطه ؟ طيب ما انا أستبدله واريح نفسى ؟؟

ج : الخراط بيعمل الشغلانة دى تسليه وماتنساش انه اكتر واحد عنده من الاطباق دى لأنه طول النهار والليل بيفك فى مواتير ويعمل عمرات ويقفل يبقى علشان تشترى الأطباق هتجيب العلبة الكاملة والعده والموضوع هيكلفك على الأقل 300 - 400 جنيه وظبط التاكيهات عند اى خراط هيكلفك 30 جنيه والإختيار اولا وأخيرا لحضرتك

وده اللى بيعمله الخراط بالظبط